BAKI, AzerVoice
“Microsoft” serverlərinə qarşı həyata keçirilən kiberhücum ABŞ-ın dövlət qurumları və özəl sektoruna təsir göstərib.
AzerVoice xəbər verir ki,
“Microsoft”un geniş istifadə olunan server proqram təminatındakı
boşluqdan yararlanan hakerlər ABŞ-da federal və əyalət
agentliklərinə, eləcə də bir sıra özəl və beynəlxalq qurumlara
qarşı genişmiqyaslı kiberhücumlar həyata keçirib.
Bu barədə “Washington Post” (WP) məlumat yayıb.
Məlumata görə, ABŞ-ın şərqindəki bir əyalət rəsmisi hakerlərin hökumətin vətəndaşlara xidmət məqsədilə saxladığı ictimai sənədlər anbarını ələ keçirdiyini bildirib. Həmin sənədlər hazırda əlçatan deyil, lakin silinib-silinmədiyi hələ dəqiqləşdirilməyib.
Tədqiqatçılar hücumların universitetlərə, enerji şirkətlərinə və Asiyada fəaliyyət göstərən telekommunikasiya qurumlarına da təsir etdiyini bildirir. Eyni zamanda İspaniyada bir dövlət qurumu, ABŞ-ın Albuquerque şəhərində yerli bir idarə və Braziliyadakı universitet də bu hücumlardan zərər görüb.
Mütəxəssislər on minlərlə “Microsoft SharePoint” serverinin təhlükə altında olduğunu və bu zəifliyə qarşı hələlik hərtərəfli yeniləmənin yayımlanmadığını qeyd edirlər. Lakin bildirilir ki, hücumlar yalnız lokal serverlərə təsir edib, “Microsoft 365” kimi bulud əsaslı xidmətlər təhlükəsiz qalıb.
ABŞ Federal Təhqiqat Bürosu (FTB) açıqlamasında federal hökumət və özəl sektor tərəfdaşları ilə sıx əməkdaşlıq aparıldığını bildirib.
Qeyd edək ki, Hollandiyada yerləşən kibertəhlükəsizlik şirkəti “Eye Security” bu cür pozuntuların “Microsoft Outlook” və “Microsoft Teams” kimi əsas xidmətlərlə əlaqəli ola biləcəyini və nəticədə həssas məlumatların oğurlanması və istifadəçi parollarının ələ keçirilməsi riskinin artdığını vurğulayıb.
