BAKI, AzerVoice
Min illik kitabxanada həşərat istilası - 100 min kitabı xilas etmək üçün mübarizə gedir.
AzerVoice xəbər verir ki, Macarıstanın
Pannonhalma bölgəsində yerləşən və min illik tarixə malik olan
Pannonhalma Abbatının kitabxanası çörək böcəyi kimi tanınan
pestisid həşəratlarının hücumu ilə üz-üzə qalıb.
Mədəni irsin nadir incilərini qoruyan bu qədim kitabxanada vəziyyət
ciddi narahatlıq doğurur.
Təxminən 100 min cild kitab, bərpaçı mütəxəssislər tərəfindən tək-tək rəflərdən çıxarılaraq xüsusi dezinfeksiya qutularına yerləşdirilir. Bu, böcəklərin məhv edilməsi üçün nəzərdə tutulmuş oksigensiz azot mühitində saxlanma prosesinin ilk mərhələsidir.
Məlumata görə, infestasiya ilk dəfə kitabxananın müntəzəm təmizliyi zamanı qeyri-adi toz təbəqəsi və bəzi kitabların səhifələrində izlər müşahidə edildikdə aşkarlanıb. Həşəratlar əsasən kitab tikilməsində istifadə olunan jelatin və nişasta əsaslı yapışdırıcılara cəlb olunur.
Xatırladaq ki, Pannonhalma Abbatı 996-cı ildə — Macarıstan Krallığı qurulmazdan əvvəl salınıb və Osmanlı işğalı da daxil olmaqla saysız müharibə və fəlakətdən sağ çıxmış nadir mədəniyyət ocaqlarından biridir. Bu səbəbdən də abbatın kitabxanası YUNESKO-nun Ümumdünya İrs Siyahısına daxil edilib.
“Biz Macarıstanda ilk yazılı kitab kataloqunu qoruyub saxlayırıq. Bir kitabın həşərat tərəfindən zədələndiyini görmək, o nə qədər çox nüsxədə olsa da, mədəniyyətin bir hissəsinin itirildiyini hiss etdirməkdədir” - dey Kitabxananın direktoru İlona Ásványi bildirib.
Qeyd edək ki, 400 min cilddən ibarət bu unikal kolleksiyada 13-cü əsrə aid tam İncil, 16-cı əsrə qədər olan nadir əlyazmalar və yüzlərlə kodeks mövcuddur. Ən qiymətli əsərlər hələlik zərərdən qorunsa da, kitabxana rəhbərliyi bu miqyasda infestasiyanın ilk dəfə müşahidə olunduğunu vurğulayıb.
Hazırda kitablar altı həftəlik anaerob dezinfeksiya prosesindən keçirilir. Bu müddət ərzində hər bir əsər ayrıca təmizlənəcək, bərpa ediləcək və yalnız bundan sonra yenidən kitabxananın rəflərinə qaytarılacaq.
