BAKI, AzerVoice,Fərid Mikayılov
UEFA 2027-ci ildə keçiriləcək Çempionlar Liqasının final oyunlarının məkanlarını təsdiqləyib.
AzerVoice xəbər verir ki, kişilər arasında final İspaniyanın paytaxtı Madriddə, qadınlar arasında isə Polşanın Varşava şəhərində oynanacaq.
UEFA İcraiyyə Komitəsinin Albaniyada keçirilən iclasında qəbul edilən qərara görə, kişilər arasında final Atletiko Madrid klubunun 70 min tamaşaçı tutumuna malik Metropolitano stadionunda keçiriləcək. Stadion 2019-cu ildə Liverpulun Tottenhemi 2:0 hesabı ilə məğlub edərək kuboku qazandığı finala da ev sahibliyi etmişdi. Bu, Madridin Çempionlar Liqası finalına altıncı dəfə ev sahibliyi etməsi olacaq.
Qadınlar arasında final isə Polşanın milli arenalarından biri olan Stadion Narodovydə baş tutacaq. Bu qərar Polşa futbolu üçün mühüm hadisə kimi qiymətləndirilir.
UEFA həmçinin 2026-cı il Superkubok oyununun Avstriyanın Zalsburq şəhərində keçiriləcəyini elan edib.
Xatırladaq ki, 2026-cı ilin Çempionlar Liqası finalı Macarıstanın Budapeşt şəhərində yerləşən Puşkaş Arenada, bu mövsüm isə qadınlar arasında final Norveçin paytaxtı Oslodakı Ullevall stadionunda oynanacaq.
