BAKI, AzerVoice, Fərid Mikayılov

Macarıstanın baş naziri Viktor Orban bildirib ki, Ukrayna prezidenti Volodimir Zelenski Budapeşti açıq şəkildə hədələyib və şantaj edib.

AzerVoice xəbər verir ki, o, bu davranışın nəticəsiz qalmayacağını vurğulayıb.

“Zelenski açıq şəkildə Macarıstana hədə-qorxu gəldi. O, etiraf etdi ki, biz onların Avropa İttifaqına (Aİ) qoşulmasını dəstəkləmədiyimiz üçün ‘Drujba’ neft kəmərinə zərbələr endirirlər. Bu, bir daha sübut edir ki, biz düzgün qərar vermişik”, – deyə Orban bəyan edib.

Baş nazirin sözlərinə görə, Ukraynanın hədə və təzyiqlərlə Aİ-yə üzv olması mümkün deyil. O əlavə edib ki, Zelenskinin sözləri “nəticəsiz qalmayacaq”.

Baş nazirin ofisinin rəhbəri Gergey Gulyash da Kiyevin davranışını “Aİ namizədinə yaraşmayan” addım kimi qiymətləndirib və Ukraynanın Birliyə qəbulunun “tarixi səhv” olacağını deyib.

O, eyni zamanda Kiyevi “Drujba” neft kəmərinə hücumları dayandırmağa çağırıb.

Macarıstanın xarici işlər naziri Peter Siyarto isə Zelenskini “enerji təhlükəsizliyinə qarşı məsuliyyətsiz hücumlara” son qoymağa səsləyib.

Qeyd edək ki, Ukrayna avqustun 18-dən sonra avqustun 22-də də “Drujba” neft kəmərinə zərbə endirib. Bu boru xətti ilə Rusiya nefti Macarıstana nəql olunur.