BAKI, AzerVoice, Səməd Əyyubov
İsrail ordusu HƏMAS liderlərini, o cümlədən digər ölkələrdəki fiqurlarını da hədəfə alaraq öldürməyə hazırdır.
AzerVoice xəbər verir ki, bunu İsrail ordusunun Baş Qərargah rəisi Eyal Zamir açıqlayıb.
“İsrail Müdafiə Qüvvələri bütün istiqamətlərdə və istənilən vaxt təşəbbüsü və əməliyyat üstünlüyünü qoruyaraq hücum əməliyyatları aparır. Dünən Qəzzada HƏMAS-ın yüksək rütbəli liderlərindən biri – Əbu Ubeydəyə zərbə endirdik. HƏMAS rəhbərliyinin böyük hissəsi artıq aradan götürülüb. Əməliyyatlarımız hələ başa çatmayıb, qalan rəhbərlərin çoxu xaricdədir və biz onlara da çatacağıq” – deyə Zamir bildirib.
Baş Qərargah rəisi əlavə edib ki, ordu Qəzzada qalan israilli girovların azad edilməsi üçün səylərini davam etdirir.
“Biz onları geri qaytarmaq üçün bütün gücümüzlə fəaliyyət göstərəcəyik. Bu, bizim mənəvi borcumuzdur” – deyə o vurğulayıb.
Qeyd edək ki, İsrailin müdafiə naziri İsrael Katz daha əvvəl HƏMAS-ın hərbi qanadı olan “İzzəddin əl-Qəssam briqadaları”nın rəsmi nümayəndəsi Əbu Ubeydənin İsrail ordusu tərəfindən öldürüldüyünü təsdiqləmişdi.
