BAKI, AzerVoice, Nərmin Ağayeva
Pakistan Silahlı Qüvvələrinin Baş Qərargah rəisi general Asim Munir nüvə silahı ilə bağlı sərt bəyanatları ilə beynəlxalq ictimaiyyətdə rezonans yaradıb.
AzerVoice xəbər verir ki, ABŞ-ın Florida ştatında qapalı toplantıda çıxış edən Munir, ölkəsinin mövcudluğuna təhdid yaranacağı halda nüvə silahından istifadə edəcəklərini bildirib.
“Məhv ediləcəyimizi düşünsək, dünyanın yarısını özümüzlə birlikdə məhv edəcəyik” - deyə o qeyd edib. O, həmçinin Hindistanın su infrastrukturunu raket zərbələri ilə hədəfə ala biləcəklərini deyib. Pakistan rəsmiləri isə bu sözlərin Hindistana birbaşa ünvanlanmadığını açıqlayıb. Hindistan Xarici İşlər Nazirliyi isə bəyanatı məsuliyyətsiz adlandıraraq pisləyib.
Qeyd edək ki, Hindistan və Pakistan arasında son toqquşmalar aprelin 22-də Cammu və Kəşmirdə baş verən terror aktından sonra intensivləşib. Mayın 6-da Hindistanın raket hücumları ilə başlayan gərginlik, ABŞ vasitəçiliyi ilə mayın 10-da atəşkəs razılaşması ilə nəticələnib.