BAKI, AzerVoice, Səməd Əyyubov

Səudiyyə Ərəbistanı humanitar qurumu “Kral Salman Humanitar Yardım və Xeyriyyə Mərkəzi” Qəzza zolağının cənubunda, Xan Yunisdə yerləşən Nasser Tibb Kompleksində mühüm layihə həyata keçirib.

AzerVoice xəbər verir ki,layihə Ümumdünya Səhiyyə Təşkilatı (ÜST) ilə əməkdaşlıq çərçivəsində reallaşdırılıb.

Yeni layihə çərçivəsində ən yüksək standartlara cavab verən tibbi anbar yaradılıb və ora böyük həcmdə əsas tibbi ləvazimat göndərilərək müxtəlif şöbələrə paylanıb. Bundan başqa, böyrək çatışmazlığından əziyyət çəkən və mütəmadi dializ müalicəsinə ehtiyacı olan xəstələr üçün kompleksdəki dializ şöbəsi ən müasir avadanlıq və tibbi cihazlarla təchiz olunub. Bu addım həm xəstələrin həyatına ümid bəxş edib, həm də kompleksin müasir müalicə xidmətləri göstərmək imkanlarını əhəmiyyətli dərəcədə artırıb.

Kompleksin direktoru doktor Atif əl-Hut Səudiyyə Ərəbistanına, xüsusilə “Kral Salman Humanitar Yardım Mərkəzi”nə dəstəyə görə təşəkkür edib. Onun sözlərinə görə, bu təşəbbüs səhiyyə xidmətlərinin yaxşılaşdırılmasına və davamlılığının təmin edilməsinə mühüm töhfə verir. Əl-Hut həmçinin yeni tibbi anbarın səmərəliliyi artıracağını, dializ şöbəsinin isə xəstələrin həyat keyfiyyətinə müsbət təsir göstərəcəyini vurğulayıb.

Layihə Səudiyyə Ərəbistanının Fələstin xalqına böhran və çətinliklərdə dəstək göstərmək, səhiyyə sektorunda dərman və tibbi ləvazimat çatışmazlığını aradan qaldırmaq məqsədilə həyata keçirdiyi humanitar təşəbbüslərin bir hissəsidir.

Qeyd edək ki, Nasser Tibb Kompleksi hazırda bölgənin cənubunda bütün şöbələri ilə fəaliyyət göstərən yeganə tibbi müəssisədir. Kompleks əsasən məcburi köçkünlərdən ibarət təxminən 730 min insana xidmət göstərir. Ətrafdakı digər xəstəxanalar isə imkan baxımından daha məhdud xidmətlər təklif edir.