BAKI,
AzerVoice
ABŞ-da qızılcaya yoluxma halları son 33 ilin rekordunu vurub.
AzerVoice xəbər verir ki, ABŞ-da
2025-ci ilin əvvəlindən bu günədək 1277 nəfərdə qızılcaya yoluxma
halı qeydə alınıb.
Bu, 1990-cı ildən bəri ən yüksək göstəricidir. Qızılca epidemiyası
38 ştatı və paytaxt Vaşinqtonu əhatə edir, Texas isə 700-dən çox
yoluxma ilə siyahıya başçılıq edir.
Mütəxəssislər aşağı peyvəndlənmə səviyyəsini və anti-vaksin təbliğatını əsas səbəblər kimi göstərirlər. ABŞ Xəstəliklərə Nəzarət və Qarşısının Alınması Mərkəzləri (CDC) yoluxanların 92 faizinin ya peyvəndsiz, ya da peyvənd statusu məlum olmayan şəxslər olduğunu açıqlayıb.
Qeyd olunur ki, 3 nəfər ölüb, 155 nəfər xəstəxanaya yerləşdirilib. Qızılcanın yayıldığı əsas icmalar arasında mennonitlər kimi peyvəndə qarşı olan dini qruplar da var.
Epidemiya təhlükəsi ilə yanaşı, MMR (qızılca, parotit, məxmərək) peyvəndlərinə maraq da artıb. Məsələn, bu ilin ilk üç ayında Texasda 173.000 doza tətbiq olunub ki, bu da ötən ilə nisbətən 15.000 doz artır.
Qızılca 2000-ci ildə ABŞ-da aradan qaldırılmış xəstəlik elan edilsə də, yayılmanın bu sürətlə davam etməsi statusun itirilməsinə səbəb ola bilər.
Qeyd edək ki, qızılca epidemiyası ABŞ-dan kənarda da yayılıb – Kanada və Böyük Britaniyada minlərlə yoluxma halı aşkarlanıb. Mütəxəssislər qlobal miqyasda vaksinasiya səviyyəsinin artırılmasının vacibliyini vurğulayırlar.
