BAKI, AzerVoice
Uzun müddət oturaq qalmaq yalnız fiziki sağlamlığı deyil, həmçinin beyin quruluşunu da zədələyə bilər.
AzerVoice xəbər verir ki, Vanderbilt
Universiteti, Pittsburq Universiteti və Seul Milli Universitetinin
birgə apardığı araşdırma 50 yaş və yuxarı şəxslərdə oturma vaxtı
ilə beyin sağlamlığı arasındakı əlaqəni təhlil edib.
404 könüllü bir həftə ərzində sensor vasitəsilə izlənilib. Onların
87 faizi həftədə ən azı 150 dəqiqə idmanla məşğul olsa da, gün
ərzində daha çox oturanlarda beyin həcminin kiçilməsi və koqnitiv
funksiyaların zəifləməsi müşahidə olunub. Xüsusilə yaddaş
funksiyasına cavabdeh hipokampus bölgəsində incəlmə aşkarlanıb ki,
bu da Alzheimer xəstəliyi ilə bağlı ilk zədələnən beyin
sahələrindən biridir.
Nevroloq Dr. Marissa Qoqniat bildirib ki, Alzheimer riskini azaltmaq üçün təkcə məşq kifayət etmir, oturma müddətini də azaltmaq vacibdir. Araşdırmada oturma vaxtının artması ilə beyində yaşlanma prosesinin sürətlənməsi arasında əlaqə olduğu, genetik olaraq Alzheimer riskinə meylli olanlarda isə bu təsirin daha güclü olduğu vurğulanıb.
Vanderbilt Universitetindən Dr. Angela Jefferson əlavə edib ki, gün ərzində oturma fasilələrinin verilməsi xüsusilə yüksək risk qrupundakı insanlar üçün beynin sağlamlığını qorumaq baxımından çox önəmlidir.
Mütəxəssislər həmçinin qeyd edirlər ki, idman sağlamlıq üçün vacib olaraq qalır və kiçik hərəkətlər belə beyin funksiyalarını yaxşılaşdırmağa kömək edə bilər. Lakin oturaq həyat tərzinin uzun müddət davam etməsinin qarşısının alınması üçün əlavə tədbirlər görülməlidir.
Qeyd edək ki, bu tədqiqat beynəlxalq nüfuzlu Alzheimer's & Dementia jurnalında dərc olunub və dünyada yaşlı əhali arasında beyin sağlamlığı mövzusunda aktual məsələlərdən biri kimi diqqət çəkir.
