BAKI, AzerVoice

Çin mənşəli onlayn ticarət platforması Temu, ABŞ-a birbaşa Çindən məhsul göndərilməsini dayandırdığını elan edib və şirkət bundan sonra yalnız ABŞ ərazisindəki anbarlarda mövcud olan məhsulların satışını davam etdirəcək.

AzerVoice xəbər verir ki, bu addım ABŞ-ın Çin məhsullarına tətbiq etdiyi yeni gömrük və vergi qaydaları ilə əlaqədar atılıb.

Belə ki, 2 may tarixində Ağ Ev, əvvəlki "de minimis" qaydasının ləğv olunduğunu açıqlayıb. Həmin qaydaya əsasən, 800 dollardan ucuz olan bağlamalar ABŞ-a vergisiz daxil olurdu. Bu imkan Temu, Shein və AliExpress kimi Çin platformalarına milyonlarla ucuz məhsulu vergi ödəmədən ABŞ bazarına çıxarmağa şərait yaradırdı.

Yeni qaydalara əsasən, Çinlə ABŞ arasında poçtla göndərilən bütün bağlamalara ya 120 faiz vergi, ya da hər bağlama üçün 100 dollar sabit vergi tətbiq olunacaq. 1 iyundan etibarən bu sabit verginin 200 dollara qədər artırılması planlaşdırılır.

ABŞ-ın prezidenti Donald Tramp, "de minimis" qaydasının ləğvini iki əsas səbəblə izah edib. Birinci səbəb, kiçik və orta sahibkarlığın ədalətsiz Çin rəqabətindən qorunmasıdır. Tramp bu platformaları "keyfiyyətsiz və ucuz məhsullarla yerli biznesə qarşı yönəlmiş fırıldaq" adlandırıb.

İkinci səbəb isə narkotik qaçaqmalçılığı ilə mübarizədir. Rəsmi məlumatlara görə, Çin bağlamaları vasitəsilə ABŞ-a fentanil və digər sintetik narkotik maddələr daxil olur.