Bakı, AzerVoice

Birləşmiş Millətlər Təşkilatının Qaçqınlar üzrə Ali Komissarı Filippo Qrandi dünya üzrə məcburi köçkünlərin sayının 123 milyona çatması fonunda “təcili beynəlxalq dəstək” çağırışı edib.

AzerVoice xəbər verir ki, BMT Baş Assambleyasının Üçüncü Komitəsində çıxış edən Qrandi, xüsusilə Livanda İsrailin hava hücumları nəticəsində məktəblər, xəstəxanalar və yollar da daxil olmaqla, infrastrukturun geniş miqyasda dağıldığını vurğulayıb. O, bu hücumların Livanda humanitar vəziyyəti “kəskin” həddə çatdırdığını qeyd edib.

Son həftələrdə 470000 insan Suriyaya sığınmaq məcburiyyətində qalıb.

Sudanda da vəziyyət kritik həddədir. 18 ay öncə başlayan münaqişə nəticəsində artıq 11 milyondan çox insan öz evlərini tərk edib. Qrandi, Sudanda baş verən zorakılıqların və insan haqları pozuntularının miqyasını "təsvir etmək çətindir" deyərək, aclıq, sel və xəstəliklərin bölgədəki sosial infrastrukturu məhv etdiyini qeyd edib.

Qrandi, bir çox hökumətin sərhəd nəzarətini gücləndirməyə çalışdığı, qaçqın qəbulunu məhdudlaşdırdığı və bəzən sığınacaq verilməsini dayandırmağa cəhd etdiyi mövcud meyllərdən narahatlığını ifadə edib. O, belə yanaşmaların yalnız qeyri-effektiv deyil, həm də beynəlxalq hüquqi öhdəlikləri pozduğunu vurğulayıb.

O, dövlətləri "iqlimlə əlaqəli köç təhlükəsi ilə üzləşən icmaların dayanıqlığını gücləndirməyə" çağırıb. Bundan əlavə, o, məcburi köçkün qəbul edən ölkələrdə məcburi köçkünlərin xidmətlərə və məşğulluğa çıxış imkanlarının genişləndirilməsini və daha təhlükəsiz, qanuni yolla köç imkanlarının yaradılmasını təklif edib.

“Biz birlikdə hərəkət etməliyik – hətta çətin vaxtlarda belə,” deyə o, beynəlxalq birliyin qaçqın və vətəndaşlıqdan məhrum insanlara davamlı dəstək göstərməsinin vacibliyini vurğulayıb.