BAKI, AzerVoice, Nailə Babazadə

Fələstin Dövlətinin Prezidenti Mahmud Abbas Qəzzanın bölünməsini qəti şəkildə rədd etdiklərini bildirib və İsrailin Qəzzanın heç bir hissəsində legitimliyinin olmadığını bəyan edib.

AzerVoice xəbər verir ki, Abbas “Fəth” Hərəkatının İnqilab Şurasının 13-cü dövr açılışında çıxışı zamanı Fələstin Dövlətinin Qəzza, Qərbi Şəriə və Şərqi Qüdsü əhatə edən vahid və bölünməz coğrafi-siyasi bütöv olduğunu vurğulayıb. O, əsas prioritetlərin Qəzzada atəşkəsin daimi xarakter alması və humanitar yardımların dərhal bölgəyə daxil olmasının təmin edilməsi olduğunu deyib.

Qəzza zolağında ABŞ Prezidenti Donald Trampın planının ikinci mərhələsinin icrasının vacibliyinə toxunan Abbas, bu mərhələnin İsrailin Qəzzadan tam geri çəkilməsini, HƏMAS-ın idarəetməni təhvil verməsini və Fələstin hökumətinə tabe olan müvəqqəti inzibati komitənin fəaliyyətə başlamasını nəzərdə tutduğunu bildirib.

Abbas qeyd edib ki, sözügedən proses zorla köçürmə olmadan bərpa və yenidənqurma işlərinin aparılmasını, eləcə də beynəlxalq legitimlik və Ərəb Sülh Təşəbbüsü əsasında siyasi prosesin başlanmasını hədəfləyir.

Bu ilin “Fələstin demokratiyası ili” olacağını deyən Abbas, yerli seçkilərin aprel ayında keçiriləcəyini, “Fəth” Hərəkatının 8-ci qurultayının və Fələstin Milli Şurasına seçkilərin də il ərzində planlaşdırıldığını açıqlayıb.

O, ümumi seçkilərin isə müvafiq şərait formalaşdıqdan sonra Qəzza, Qərbi Şəriə və Şərqi Qüdsdə eyni vaxtda keçiriləcəyini bildirib.

İsrailin Qərbi Şəriə və Şərqi Qüdsdəki fəaliyyətlərinin Qəzzadakı hadisələr qədər təhlükəli olduğunu vurğulayan Abbas beynəlxalq ictimaiyyəti İsrailə təzyiq göstərməyə çağırıb.