BAKI, AzerVoice, Nailə Babazadə

İsrailin Baş naziri Benyamin Netanyahu Qüdsdə ABŞ Prezidenti Donald Trampın xüsusi nümayəndəsi Tom Barrak ilə görüşüb.

AzerVoice xəbər verir ki, görüş, bu ayın sonlarında Florida ştatında keçirilməsi planlaşdırılan ABŞ–İsrail sammiti ərəfəsində Vaşinqtonun Netanyahoya ünvanladığı açıq və sərt mesajlar fonunda baş tutub.

İsrail mediasının məlumatına görə, danışıqlarda əsas diqqət Qəzza zolağındakı vəziyyət, Suriyada təhlükəsizlik məsələləri və Netanyahunun Tramp ilə gözlənilən görüşünə yönəlib. ABŞ tərəfi Qəzzada atəşkəsin ikinci mərhələsinə keçidin vacibliyini vurğulayaraq, Türkiyənin mümkün beynəlxalq missiyada rolunun əhəmiyyətini ön plana çıxarıb. Bildirilib ki, Türkiyə HƏMAS üzərində təsir imkanlarına malik əsas aktorlardan biridir və prosesdən kənarda saxlanılması planın risk altına düşməsinə səbəb ola bilər.

Vaşinqton həmçinin HƏMAS-ın yüksək rütbəli üzvlərindən birinin öldürülməsini atəşkəsin pozulması kimi qiymətləndirib və Netanyahunun bu məsələdəki açıqlamalarını qəbuledilməz sayıb. ABŞ rəsmiləri İsrailin Qərb Sahilindəki siyasətindən və regionda gərginliyi artıran addımlarından narahat olduqlarını da gizlətməyiblər.

Suriyaya dair müzakirələrdə ABŞ İsrailə “qırmızı xətlər”ini çatdıraraq, bölgədə sabitliyin qorunmasının prioritet olduğunu və tez-tez həyata keçirilən hərbi əməliyyatların risk yaratdığını bildirib. Livan məsələsində isə Vaşinqton Hizbullaha qarşı məhdud təzyiqi dəstəklədiyini, lakin genişmiqyaslı eskalasiyaya qarşı olduğunu vurğulayıb.

Məlumatlara görə, Tramp administrasiyası Netanyahunun davranışından narazıdır və onun Trampın vasitəçiliyi ilə əldə olunmuş razılaşmaların nüfuzuna zərər vurmasına imkan verməyəcəyini açıq şəkildə ifadə edib. İsrailli analitiklər Netanyahunun ABŞ-la münasibətləri tam pozmamaq üçün müəyyən güzəştlərə gedə biləcəyini bildirirlər.

Görüşdən sonra Tom Barrak danışıqları regional sülh və sabitliyə yönəlmiş konstruktiv dialoq kimi dəyərləndirib.