BAKI, AzerVoice, Nailə Babazadə

ABŞ-ın prezidenti Donald Tramp, İsraillə HƏMAS arasında əldə olunan atəşkəs razılaşmasının pozulmasına icazə verməyəcəyini vəd edib.

AzerVoice xəbər verir ki, adı açıqlanmayan amerikalı rəsmilərə istinadən yayımlanan xəbərdə, İsrailin mart ayında əldə olunan əvvəlki atəşkəs razılaşmasını pozduğu xatırladılıb. Bu səbəbdən Həmas tərəfi yenidən oxşar nəticənin ortaya çıxacağından narahat olduğunu bildirib.

Bununla belə, danışıqlarda iştirak edən Trampın Yaxın Şərq üzrə xüsusi nümayəndəsi Stiv Witkoff və Trampın kürəkəni Cared Kuşner, Türkiyə, Misir və Qətərdən olan vasitəçilər vasitəsilə HƏMAS-a Trampın 20 maddəlik planının tam şəkildə dəstəkləndiyini və həyata keçiriləcəyini çatdırıblar.

Trampın İsrailin atəşkəsi pozmasına imkan verməyəcəyi ilə bağlı verdiyi zəmanətin HƏMAS-ın razılaşmanı qəbul etməsində mühüm rol oynadığı bildirilir.

Eyni zamanda, ABŞ-ın Qəzzada əldə olunan atəşkəsin icrasını izləmək üçün İsrailə 200 hərbçi göndərəcəyi qeyd olunub. Bu addım da Trampın zəmanətinin tərkib hissəsi kimi qiymətləndirilir.

Məlumata görə, ABŞ əsgərləri Qəzza torpaqlarına daxil olmayacaq, onlar atəşkəsin gedişatını İsraildə yaradılacaq xüsusi nəzarət mərkəzindən izləyəcəklər.