BAKI, AzerVoice, Nailə Babazadə

ABŞ Prezidenti Donald Tramp, İsrail və Fələstin arasında sülhün təmin olunması üçün 20 maddəlik Qəzza planını açıqlayıb. Plana əsasən, ABŞ hər iki tərəfi dialoqa təşviq edəcək və razılıq əldə olunarsa, hücumlar dayandırılacaq. Trampın sözlərinə görə, plan bölgədə daimi sabitliyin yaradılmasına yönəlib.

AzerVoice xəbər verir ki, planın əsas bəndlərinə görə, İsrail Qəzzanı ilhaq etməyəcək və bölgəni işğal etməyəcək. Eyni zamanda, Fələstinlilər Qəzzanı tərk etməyə məcbur edilməyəcək. Qəzza zolağına dərhal humanitar yardım göndəriləcək və bu yardım Birləşmiş Millətlər Təşkilatı ilə Qızıl Aypara vasitəsilə çatdırılacaq. Həmçinin bölgəyə müvəqqəti beynəlxalq sülhməramlı qüvvələr yerləşdiriləcək. Bu qüvvələrin tərkibində ABŞ, ərəb ölkələri və digər beynəlxalq tərəfdaşlar təmsil olunacaq.

Plan çərçivəsində HƏMAS-ın saxladığı girovları azad edəcəyi, İsrailin isə min 700 əsir və 250 fələstinli məhkumu sərbəst buraxacağı bildirilib.

Donald Tramp Qəzzanın yenidən qurulması üçün ayrıca iqtisadi inkişaf planı hazırlanacağını da açıqlayıb. Bölgədə ictimai xidmətlər və bələdiyyələrin fəaliyyətinə texnokratlardan ibarət keçid komitəsi nəzarət edəcək. Bu komitəyə həm fələstinli mütəxəssislər, həm də beynəlxalq ekspertlər daxil olacaq.

Yeni yaradılacaq “Sülh Şurası” adlı beynəlxalq orqan keçid komitəsinin fəaliyyətinə nəzarət edəcək. Sülh Şurasına isə birbaşa Donald Tramp rəhbərlik edəcək. Mümkün üzvlər arasında keçmiş Böyük Britaniya Baş naziri Toni Bleyerin də adı keçir.

Planın təqdimatı zamanı Tramp ötən həftə Nyu-Yorkda keçirilən görüşlərdə bu təşəbbüsə dəstək verən ölkələri sadalayıb və Türkiyə Prezidenti Rəcəb Tayyib Ərdoğanla münasibətlərinə xüsusi vurğu edib. “Prezident Ərdoğan mənim dostumdur. Güclü adamdır, yaxşı adamdır,” – deyə Tramp bildirib.

İsrail Baş naziri Benyamin Netanyahu Trampın planını qəbul etdiyini açıqlayıb. HƏMAS isə məsələ ilə bağlı yazılı heç bir bildiriş almadıqlarını bəyan edərək, planın daha çox İsrailin baxışına uyğun olduğunu bildirib.