BAKI,AzerVoice

Əfqanıstanda Taliban hökuməti bazar günü açıqlama yayaraq ölkədə saxlanılan bir ABŞ vətəndaşının azad edildiyini bildirib. AzerVoice xəbər verir ki, bu addım ABŞ nümayəndə heyətinin girov mübadiləsini müzakirə etmək üçün Kabilə səfərindən bir neçə həftə sonra atılıb.

Əfqanıstan Xarici İşlər Nazirliyi bəyanatında azad edilən şəxsin kimliyini Əmir Əmiri kimi açıqlayıb və onun ABŞ prezidenti Donald Trampın girovlarla bağlı xüsusi nümayəndəsi Adam Bolerə təhvil verildiyini bildirib.

ABŞ-ın dövlət katibi Marko Rubio bazar günü bəyan etdi ki, bu azadlıq “irəliyə doğru mühüm addımdır”. “Əfqanıstanda hələ də haqsız yerə saxlanılan amerikalılar var. Bütün vətəndaşlarımız evlərinə qayıtmayınca prezident Tramp rahatlanmayacaq”-deyə o bildirib.

Xatırladaq ki, Boler bu ayın əvvəlində nadir bir səfərlə Kabilə getmiş və Taliban hökuməti ilə mümkün məhbus mübadiləsini müzakirə etmişdi.

“Bu gün Əfqanıstan həbsxanasından Əmir Əmiri adlı ABŞ vətəndaşı azad edilib. Əfqanıstan hökuməti vətəndaşların məsələlərinə siyasi prizmadan baxmır və bu cür problemlərin diplomatiya vasitəsilə həllinin mümkün olduğunu göstərir”- Əfqanıstan XİN “X” platformasında yaydığı açıqlamada bildirib.

“France-Presse” agentliyinin məlumatına görə, Əmiri işi barədə çox az məlumat var və bu məsələ geniş müzakirə olunmayıb.

Taliban hakimiyyəti daha əvvəl – sentyabrın 20-də, təxminən 8 aylıq həbsdən sonra Kabildə saxlanılan 80 yaşlı Piter Reynolds və onun 76 yaşlı həyat yoldaşı Barbi Reynoldsu azad etmişdi.

Taliban hökumətinin açıqlamasına əsasən, həm amerikalının, həm də britaniyalı cütlüyün azad edilməsində Qətər vasitəçi rolunu oynayıb.