BAKI,AzerVoice, Fərid Mikayılov

Əfqanıstan müdafiə naziri Məhəmməd Yaqub Mücahid Rusiya, ABŞ və Çini ölkəsi uğrunda hərbi qarşıdurma deyil, iqtisadi və ticarət əməkdaşlığı sahəsində rəqabət aparmağa çağırıb.

AzerVoice xəbər verir ki, Mücahid bildirib ki, böyük güclər arasında qarşılıqlı güvən mövcuddur.

“Rusiya və Çin düşünmür ki, Əfqanıstan ABŞ-ın göstərişi ilə onlara qarşı hərəkət edəcək və ya ərazisini bu məqsədlə istifadə edəcək. ABŞ da inanmır ki, Rusiya və Çin Əfqanıstanı onlara qarşı istifadə etmək istəsin. Gəlin daha yaxşısı, ticarət edək, yollar, zavodlar inşa edək, elektrik enerjisi layihələrinə sərmayə qoyaq”- deyə o bildirib.

Nazir əlavə edib ki, digər dövlətlər də Əfqanıstana qarşı “pis niyyətlərdən” əl çəkməlidir.

“Əfqanıstan heç bir ölkəyə qarşı düşmənçilik bəsləmir və islam şəriəti əsasında hamı ilə yaxşı münasibətlər qurmaq niyyətindədir”- deyə nazir vurğulayıb.

Xatırladaq ki, avqustun 10-da Taliban ABŞ-dan onların hakimiyyətini tanımağı və Vaşinqtondakı səfirlik binasını geri qaytarmağı tələb edib. Hərəkatın liderinin sözçüsü Zəbiullah Mücahid bildirmişdi ki, Rusiya artıq Əfqanıstan rəhbərliyini tanıyıb, çünki “ölkənin niyyətlərini başa düşüb”. O, digər dövlətləri də oxşar addımlar atmağa çağırıb.