BAKI, AzerVoice, Nailə Babazadə
ABŞ Prezidenti Donald Tramp, BMT Baş Assambleyasının kənar çərçivəsində Türkiyə, Səudiyyə Ərəbistanı, BƏƏ, Qətər, Misir, İordaniya, İndoneziya və Pakistan liderləri ilə toplantı keçirəcək. Tramp bu görüşdə Qəzzədə atəşkəsin əldə olunması, müharibədən sonrakı idarəetmə və İsrailin bölgədən çəkilməsi ilə bağlı təkliflər təqdim etməyi planlaşdırır.
AzerVoice xəbər verir ki, bu barədə məlumat verən Ağ Evin Mətbuat Katibi Karoline Leavitt, jurnalistlərə açıqlamasında Trampın bu gün adıçəkilən ölkələrin liderləri ilə mühüm görüş keçirəcəyini bildirib.
ABŞ mərkəzli “Axios” xəbər saytının yaydığı məlumata görə, Tramp rəhbərliyi görüşdə liderlərə israilli girovların azad olunması, müharibənin dayandırılması və Qəzzada HƏMAS-ın iştirakı olmadan yeni idarəetmə modelinin qurulması planlarını açıqlayacaq.
“Axios”un xəbərinə əsasən, Tramp administrasiyası İsrailin Qəzzadan çıxmasını təmin etmək, bölgədə keçid dövrünü təşkil etmək və yenidənqurma proqramlarını maliyyələşdirmək üçün müsəlman və ərəb ölkələrinin Qəzzaya hərbi qüvvə göndərməsinə dəstək verməsini istəyir.
Bu təşəbbüsün məqsədi Qəzzada sabitliyi təmin etmək və yeni idarəçiliyin qurulması üçün beynəlxalq mexanizm yaratmaqdır.