BAKI,AzerVoice, Fərid Mikayılov
İran Prezidenti Məsud Pezeşkian İsrailin Qətərə hücumunu kəskin şəkildə pisləyərək, İslam dünyasını vahid və praktiki mövqedən çıxış etməyə çağırıb.
AzerVoice xəbər verir ki, Pezeşkian bildirib ki, İran Qətərin yanındadır və lazım gəldikdə bu ölkəni dəstəkləmək üçün bütün addımları atmağa hazırdır.
Qətər Əmiri Şeyx Təmim bin Həməd Al Tani ilə telefon danışığı aparan Pezeşkian vurğulayıb ki, İsrailin təcavüzkar siyasəti bölgəni qeyri-sabitliyə sürükləyir.
“İslam ölkələri həm sözlə, həm də əməli addımlarla bu açıq cinayətləri ciddi şəkildə qınamalı, beləliklə bu rejimin oxşar addımları təkrar etməsinin qarşısı alınmalıdır”- deyə o bildirib.
O, əlavə edib ki, İsrail beynəlxalq hüququn heç bir prinsipinə hörmət etmir və bu davranışlarını yalnız ABŞ-ın dəstəyi ilə davam etdirir.
Şeyx Təmim isə söhbət zamanı İsrail Baş naziri Benyamin Netanyahunun “cinayətlərində heç bir sərhəd tanımadığını” qeyd edərək, ABŞ-ın təqdim etdiyi atəşkəs planının HƏMAS tərəfindən müsbət qarşılandığını bildirib. Onun sözlərinə görə, HƏMAS rəhbərliyi planı müzakirə edərkən İsrail həmin görüşün keçirildiyi binaya hücum edib.
Qətər lideri ümid etdiyini bildirib ki, yaxın günlərdə İran, Qətər və digər İslam ölkələri əlaqələri intensivləşdirərək İsrailin təcavüzünün qarşısını almaq üçün birgə tədbirlər görəcəklər.
Xatırladaq ki, İsrailin Doha şəhərinə endirdiyi hava zərbəsi zamanı HƏMAS-ın qərargahı hədəf alınmışdır.
İran Prezidenti BMT-ni, İslam Əməkdaşlıq Təşkilatını və digər beynəlxalq qurumları hadisəyə dərhal, sərt və praktik cavab verməyə çağırıb. Onun sözlərinə görə, bölgədə qalıcı sülh yalnız işğal və təcavüzün dayandırılması ilə mümkündür.
