BAKI, AzerVoice, Səməd Əyyubov

ABŞ prezidenti Donald Tramp Qazaxıstana səfər edəcəyini istisna etməyib.

AzerVoice xəbər verir ki, o Qazaxıstan prezidenti Kasım-Jomart Tokayevlə “çox yaxşı söhbət” apardığını bildirib.

“Gedə bilərəm”, – deyə Tramp Qazaxıstana səfər edib-etməyəcəyi barədə suala cavab verib. “Onunla çox yaxşı söhbətim oldu. Ona salam çatdırın. O, yaxşı insandır” - deyə, o Tokayev haqqında danışarkən qeyd edib.

Qazaxıstanın baş nazirinin müavini Serik Jumanqarin ayın əvvəlində bildirib ki, ABŞ ilə iqtisadi əlaqələrin inkişafı respublikanın xarici siyasətində prioritetdir. Onun sözlərinə görə, Astana ticarət dövriyyəsinin artırılması üçün potensial görür. Bu məsələ ABŞ Ticarət Palatasının vitse-prezidenti Huş Çoksi və Amerika şirkətlərinin nümayəndələri ilə keçirilən görüşdə də müzakirə olunub, həmçinin ticarət maneələri məsələsinə toxunulub.

Xatırladaq ki, avqustun 1-də Tramp 60-dan çox ölkə və Avropa İttifaqına (Aİ) qarşı 15 faizdən 41 faizədək rüsumların tətbiq edilməsinə dair fərman imzalayıb. Qazaxıstan üçün tarif dərəcəsi 25 faiz olaraq müəyyən edilib. Bundan əvvəl Tramp qərarın səbəblərini izah edən məktubu Tokayevə göndərmişdi. Tokayev isə cavab məktubunda kompromisə nail olunacağına əminliyini ifadə edib. Qazaxıstanın Ticarət Nazirliyi Vaşinqtona vəziyyətin nizamlanması ilə bağlı təkliflər təqdim edib. Nazirliyin məlumatına görə, yeni rüsumlar respublikanın ABŞ-a ixracının təxminən 5 faizinə təsir göstərir.