BAKI, AzerVoice, Nərmin Ağayeva
Pakistanda güclü musson yağışlarının səbəb olduğu daşqınlar nəticəsində avqustun 23-dən 31-dək 33 nəfər həyatını itirib.
AzerVoice xəbər verir ki, “Dawn” qəzetinin Pəncab Fəlakət İdarəsinə (PDMA) istinadən verdiyi məlumata görə, son bir həftədə Pəncab əyalətində leysan yağışların səbəb olduğu daşqınlar 33 nəfərin ölümünə və 8 nəfərin yaralanmasına səbəb olub. Daşqınlar təxminən 2 milyon insana təsir edib, bu səbəbdən 506 yardım düşərgəsi qurulub və xilasetmə qrupları 760 min insanı və 516 min heyvanı təhlükəsiz ərazilərə təxliyə edib. Pakistan Milli Fəlakət İdarəsi (NDMA) isə sentyabrın 1-dən 3-dək İslamabad və Pəncabın müxtəlif bölgələrində güclü yağışların gözlənildiyini və daşqın riskinin artacağını xəbərdar edib.
Pəncab əyalətinin baş naziri Məryəm Aurangzeb bu fəlakəti “Pəncab tarixindəki ən pis daşqın” kimi qiymətləndirərək, Çenab, Ravi və Sutlej çaylarında suyun səviyyəsinin misli görünməmiş dərəcədə yüksəldiyini bildirib. NDMA-nın açıqlamasına görə, ölkədə son 24 saat ərzində daşqınlar nəticəsində 23 nəfər həyatını itirib, ümumilikdə isə iyunun 26-dan bəri daşqınlar 800-dən çox insanın ölümünə səbəb olub.
Qeyd edək ki, Pakistanın Pəncab əyaləti ölkənin əsas kənd təsərrüfatı mərkəzi hesab olunur və daşqınlar bölgədə kənd təsərrüfatına ciddi ziyan vuraraq iqtisadi böhrana səbəb ola bilər.
