BAKI, AzerVoice, Nərmin Ağayeva

Elon Maskın “Amerika Partiyası” planları təxirə salınıb.

AzerVoice xəbər verir ki, milyarder iş adamı Elon Mask ABŞ-da üçüncü siyasi qüvvə kimi təsis etməyi planlaşdırdığı “Amerika Partiyası” layihəsini hələlik dayandırıb. Buna səbəb kimi respublikaçı seçicilərin parçalanması riski və vitse-prezident J.D. Venslə münasibətlərə xələl gəlməsi ehtimalı göstərilir.

Wall Street Journal-ın məlumatına görə, Mask diqqətini daha çox öz şirkətlərinə yönəltmək qərarına gəlib. O, respublikaçı elektoratın parçalanmasının qarşısını almaq və Venslə münasibətləri qorumaq üçün partiya planlarından geri çəkilib. Rəsmilər bildiriblər ki, milyarder gələcəkdə – xüsusilə 2028-ci ildə prezident seçkilərində Vensin namizədliyi halında ona maliyyə dəstəyi verməyi nəzərdən keçirir.

Mask iyulun sonunda üçüncü tərəf kampaniyaları təşkil edən qrupla planlaşdırılan görüşü də təxirə salıb. Qeyd edək ki, iş adamı yeni partiyanın əsas prioritetlərindən birinin Ceffri Epstein işi ilə bağlı sənədlərin ictimaiyyətə açıqlanması olacağını bildirmişdi.

Xatırladaq ki, Mask və hazırkı prezident Donald Tramp arasında münasibətlər də son dövrlər gərginləşib. Tramp milyarderin vergi endirimləri ilə bağlı açıqlamalarından məyus olduğunu deyib. Mask isə cavabında “Mən olmasaydım, Tramp seçkiləri uduzardı” sözlərini yazaraq münasibətlərdəki gərginliyi açıq şəkildə nümayiş etdirib.