BAKI, AzerVoice, Nailə Babazadə

ABŞ Prezidenti Donald Tramp və Rusiya Prezidenti Vladimir Putinin bu gün Alyaskada keçirəcəyi görüş ərəfəsində, Ukrayna və Qərb ölkələri güclü birlik mesajı verib. Görüşdə Rusiyanın Ukraynaya qarşı müharibəsi və Rusiya–ABŞ münasibətlərinin müzakirə olunacağı gözlənilir.

AzerVoice xəbər verir ki,Tramp və Putin müharibə başlayandan bəri ilk dəfə bir araya gələcək. Görüş dünya ictimaiyyəti tərəfindən böyük maraqla izlənilir. Ukrayna isə açıq şəkildə bəyan edir ki, bu masada Kiyev olmadan qərarların qəbul edilməsi yolverilməzdir.

Görüş ərəfəsində Böyük Britaniya, Fransa, Almaniya, İtaliya, Polşa, Finlandiya və Avropa İttifaqı Komissiyası birgə bəyanat yayaraq bildiriblər ki, Ukrayna iştirak etmədiyi halda barışıq prosesi qeyri-legitim sayılacaq. Bildirilir ki, diplomatik həll yalnız Ukraynanın ərazi bütövlüyü və suverenliyi çərçivəsində mümkündür.

NATO Baş katibi Mark Rutte də bildirib ki, sülhə aparan yolun açılması üçün ilk addım Rusiyadan gəlməlidir.

Avropa İttifaqı Komissiyasının rəhbəri Ursula von der Leyen isə qeyd edib ki, Aİ, ABŞ və NATO Ukrayna ilə bağlı vahid mövqedədir və ədalətli, davamlı sülh axtarışındadır.

Polşa Baş naziri Donald Tusk bəyan edib ki, bu prosesdə əsas məsələ Trampın Rusiyaya güvənilməyəcəyinə inandırılmasıdır.

Fransa Prezidenti Emmanuel Makron isə vurğulayıb ki, Ukrayna ilə bağlı “hər şey” yalnız Kiyevlə razılaşdırılmalıdır, o cümlədən ərazi məsələləri də.

Almaniya kansleri Fridrix Mers isə görüşdən Avropanın və Ukraynanın əsas təhlükəsizlik maraqlarının təmin olunmasını gözlədiklərini bildirib.

Ukrayna Prezidenti Volodimir Zelenski Alyaska görüşündən dərhal atəşkəs qərarı çıxmasını istədiklərini bildirib. O, qeyd edib ki, Rusiya hazırda müharibəni dayandırmaq niyyətində deyil və məqsədi bütün Ukraynanı işğal etməkdir.

Kiyev eyni zamanda vurğulayır ki, ölkə Konstitusiyası əsasında heç bir ərazi güzəştinə gedilməyəcək. Ukrayna tərəfi Rusiya ilə mümkün liderlər səviyyəsində danışıqlarda Trampın da masa arxasında olmasını tələb edir.