BAKI,AzerVoice, Nərmin Ağayeva
Ilon Mask Yaponiyanın 2025-ci ildə ciddi əhali itkisi ilə üzləşə biləcəyi barədə xəbərdarlıq edib.
AzerVoice xəbər verir ki, texnologiya milyarderi Ilon Mask Yaponiyanın sürətli demoqrafik tənəzzül yaşadığını və bu il ölkənin təxminən bir milyon nəfər əhalisini itirə biləcəyini bildirib. O, daha əvvəl X platformasında yazaraq, Yaponiyanın aşağı doğum səviyyəsinə görə “yoxluq” riski ilə qarşı-qarşıya olduğunu vurğulayıb və süni intellekti bu tənəzzülü geri qaytara biləcək “yeganə ümid” kimi dəyərləndirib.
Mask bu açıqlamanı World Statistics-in “Yaponiyanın əhalisi 2024-cü ildə 900.000 daha çox ölümlə azalır” məlumatına istinadla verib. Yaponiya Səhiyyə Nazirliyinin rəsmi statistikalarına görə, ötən il 686 061 doğuş və 1 605 298 ölüm qeydə alınıb ki, bu da əhalinin xalis sayının 919 000 nəfər azalması deməkdir.
Qeyd edək ki, Yaponiya uzun illərdir azalan doğum səviyyəsi və yaşlanan əhali problemi ilə mübarizə aparır, hökumət isə müxtəlif stimullaşdırıcı tədbirlər həyata keçirməyə çalışır.
