BAKI,AzerVoice

İran İslam Respublikasının Xarici İşlər Nazirliyi ABŞ-ın Qəzza zolağında İsrail və HƏMAS arasında atəşkəs danışıqlarında İranın müdaxilə etməsi ilə bağlı iddialarını qətiyyətlə rədd edib.

AzerVoice xəbər verir ki, nazirliyin sözçüsü İsmayıl Bəqai, ABŞ prezidenti Donald Trampın bu barədə səsləndirdiyi fikirləri “əsassız və məsuliyyətdən yayınma cəhdi” kimi qiymətləndirib.

“İran, beynəlxalq ictimaiyyətin üzvü kimi, Qəzzada davam edən soyqırımı qətiyyətlə pisləyir və işğalçı İsrail rejiminin cinayətlərini dayandıracaq, Fələstin xalqının əzabını azaldacaq istənilən prosesi dəstəkləyir” – deyə Bəqai bildirib.

Tramp daha əvvəl verdiyi açıqlamada, İranın atəşkəs danışıqlarına müdaxilə etdiyini və HƏMAS-a siqnallar və göstərişlər verdiyini iddia edib.

Bu iddialara cavab olaraq Bəqai qeyd edib ki, HƏMAS nümayəndələri Qəzza xalqının mənafeyini qorumaq və müvafiq qərarlar vermək üçün tam səlahiyyət və qabiliyyətə malikdir və üçüncü tərəflərin müdaxiləsinə ehtiyac yoxdur.

Bəqai ABŞ-ı İsrailin Qəzzada törətdiyi cinayətlərdə, o cümlədən qadın və uşaqlar da daxil olmaqla 60 minə yaxın insanın ölümündə, dolayısı ilə iştirakda ittiham edərək, bu kimi açıqlamaların Vaşinqtonun məsuliyyətdən yayınmaq məqsədi daşıdığını bildirib.

İsrailin Qəzzanı blokada altında saxlaması və humanitar yardımın qarşısını almasına diqqət çəkən Bəqai, ABŞ rəhbərliyinə çağırış edib.

“Vaşinqton İsrailə ölümcül silahlar göndərməyi dayandırmalı, onu soyqırımı bitirməyə məcbur etməli və beynəlxalq mexanizmlər vasitəsilə humanitar yardımın Qəzzaya daxil olmasını təmin etməlidir”- deyə Bəqai bildirib.

O, yalnız bu şərtlər daxilində Qəzzada dayanıqlı atəşkəsin mümkün ola biləcəyini və günahsız insanların həyatının xilas edilə biləcəyini vurğulayıb.