BAKI, AzerVoice
Konqonun şərqində yerləşən İturi əyalətinin Komanda qəsəbəsində ekstremist “Demokratik Qüvvələr Alyansı” (ADF) qruplaşmasının döyüşçüləri 40-dan çox insanı qətlə yetirib.
AzerVoice xəbər verir ki, bu barədə Konqo radiosu məlumat yayıb.
Hücum nəticəsində həlak olan 43 nəfərin 20-si kilsədə gecə duasında iştirak edənlər olub. Silahlılar bir neçə ictimai binanı və şəxsi evi yandırıblar.
Konqo hökumət qüvvələri və İturidə Konqo rəhbərliyi ilə razılaşdırılmış şəkildə yerləşən Uqanda ordusunun bölmələri hazırda hücum edən silahlıların axtarışını aparırlar.
Qeyd edək ki, hökumətə qarşı silahlı mübarizə aparan ADF qruplaşması 1995-ci ildə Uqandada yaradılıb. 2003-cü ildə Uqanda Silahlı Qüvvələrinin zərbələri nəticəsində ADF silahlıları geri çəkilərək Konqonun şərq bölgələrində gizləniblər və orada hərbi və mülki obyektlərə mütəmadi hücumlar edirlər.
Konqo və Uqandanın silahlı qüvvələri ADF qruplaşmasının məhv edilməsi məqsədilə artıq ikinci ildir ki, Konqo ərazisində birgə hərbi əməliyyatlar həyata keçirirlər.
