BAKI, AzerVoice, Səməd Əyyubov – Türkiyənin Enerji və Təbii Sərvətlər naziri Alparslan Bayraktar, Konqonun Baş naziri Anatol Kolline Makosso ilə enerji və mədən sahəsində əməkdaşlıq imkanlarını müzakirə edib.
AzerVoice xəbər verir ki, bu barədə Nazir X sosial şəbəkəsində paylaşım edib.
Onun sözlərinə görə, görüş zamanı mədənçilik və karbohidrogen sahələrində böyük potensiala, həmçinin bərpa olunan enerji imkanlarına malik olan Konqo ilə ortaq layihələr inkişaf etdirmək məsələləri müzakirə olunub.
“Afrika ölkələri ilə enerji və mədən sahələrində əməkdaşlığımızı genişləndirməyi, qarşılıqlı faydaya əsaslanan davamlı tərəfdaşlıqlar qurmağı hədəfləyirik” - deyə, o yazıb.
Bundan əvvəl, Alparslan Bayraktar Qabonun Su və Enerji Təchizatı naziri Filipp Tonanqoye ilə "Türkiyə Respublikası Hökuməti ilə Qabon Respublikası Hökuməti arasında Enerji Sahəsində Əməkdaşlıq haqqında Anlaşma Memorandumu"nu imzalamışdı.