BAKI, AzerVoice

Malayziya hakimiyyəti, Kamboca ilə Tailand arasında davam edən silahlı münaqişənin həlli üzrə bazar ertəsi baş tutacaq danışıqlarda vasitəçi rolunu üzərinə götürəcək.

AzerVoice xəbər verir ki, bu barədə Malayziyanın xarici işlər naziri Məhəmməd Həsən məlumat verib.

“Tərəflər Malayziyaya tam etibar etdiklərini və vasitəçiliyi bizim həyata keçirməyimizi istədiklərini bildirdilər” – deyə, nazir qeyd edib.

Həsən, Tailand və Kamboca XİN rəhbərləri ilə telefon danışığından sonra bildirib ki, tərəflər münaqişənin nizamlanması prosesinə əlavə ölkələrin cəlb olunmasına ehtiyac olmadığı barədə razılığa gəliblər.

Xatırladaq ki, daha əvvəl Kamboca Baş naziri Hun Manet və Tailandın müvəqqəti baş naziri Phumtam Veçayaçayın bazar ertəsi Malayziyada görüş keçirəcəyi və burada bir neçə gündür davam edən silahlı qarşıdurmanın həlli yollarını müzakirə edəcəyi bildirilmişdi.

Qeyd edək ki, iyulun 24-də Kamboca-Tailand sərhədində Kambocaya məxsus minanın partlaması nəticəsində Tailand ordusunun beş hərbçisinin yaralanması ilə silahlı toqquşmalar başlayıb. Tərəflər insidentə görə bir-birini ittiham ediblər.

İki ölkə arasında münasibətlər, may ayında hər iki ölkənin iddia etdiyi sərhəd ərazisində baş verən atışma zamanı kambocalı əsgərin həlak olmasından sonra daha da gərginləşmişdi.