BAKI, AzerVoice
Kamboca baş naziri Hun Manet, ölkəsi ilə Tailand arasında baş verən sərhəd toqquşmalarından sonra Malayziya baş naziri Ənvər İbrahimin təklif etdiyi atəşkəsi qəbul etdiklərini açıqlayıb.
AzerVoice xəbər verir ki, bu barədə Hun Manet "Facebook" sosial şəbəkəsində məlumat verib.
Məlumata görə, o, Tailandla sərhəddə baş verən qarşıdurmalardan sonra Ənvər İbrahimlə telefon danışığı aparıb. Ənvər İbrahim tərəfləri dərhal atəşkəsə çağırıb və Hun Manet onun bu təklifini qəbul edib.
Baş nazir həmçinin bildirib ki, Ənvər İbrahim Tailandın müvəqqəti baş naziri Phumtam Veçayacay ilə də danışıb və onun da atəşkəs təklifini qəbul etdiyini bildirib.
Bununla belə, Hun Manet əlavə edib ki, Tailand tərəfi atəşkəsin qüvvəyə minməsi üçün əvvəlcə müəyyənləşdirilmiş tarix və vaxtdan imtina edib və daha sonrakı bir tarixi nəzərdə tutub.
“Tailand və Kamboca arasında hazırkı silahlı qarşıdurmanın həll yolu Tailand tərəfinin atəşkəsi qəbul etməkdə iradə göstərməsindən keçir” - deyə, o bildirib.
Qeyd edək ki, cənub-şərqi Asiyada yerləşən Tailand və Kamboca arasında uzun müddətdir ərazi mübahisəsi baş verir.
Sərhəd razılaşmasının pozulması səbəbindən mayın 28-də bölgədə qısa müddətli qarşıdurma baş vermiş, hər iki ölkənin ordusu problemin dinc yolla həlli barədə razılığa gəlmişdi.
Tailand isə Kamboca ilə sərhəddəki bütün nəzarət məntəqələrinin Banqkok tərəfindən idarə olunacağını açıqlamışdı.
Təxminən iki ay sonra, dünən baş vermiş yeni qarşıdurmalarda Kambocada bir, Tailandda isə 14 nəfərin həlak olduğu bildirilib. Hər iki ölkə bölgədən minlərlə insanı təxliyə etdiyini bəyan edib.
Tərəflər ilk atəşi kimin açdığı barədə bir-birini günahlandırır.
