BAKI, AzerVoice
İranın Xarici Işlər naziri Abbas Əraqçi ABŞ-ın İsrailə verdiyi dəstəyin bölgədə mülki insanların ölümünə səbəb olduğunu bildirib.
AzerVoice xəbər verir ki, Əraqçi İranın Hizbullah, HƏMAS və Husilərə dəstək verdiyi ilə bağlı ittihamlara cavab verib.
"Bu, amerikalıların və israillilərin etdiyinin eynisidir. ABŞ İsraili Fələstin, Qəzza, İordan çayının qərb sahili, Livan, İran və Yəməndə insanları öldürməsi üçün hər cür müasir silahla təmin edir." - deyə nazir bildirib.
Əraqçi həmçinin qeyd edib ki, İran adıçəkilən qrupları daim siyasi və digər formalarda dəstəkləyib və onların "mübarizəsini həmişə qanuni" hesab edib.
Bu qrupların “İsraili xəritədən silmək” istədikləri barədə fikirlərə münasibət bildirən Əraqçi əlavə edib ki, “Bunu heç vaxt biz deməmişik. Bu onların öz mövqeyidir. Onlar öz vətənləri üçün mübarizə aparırlar və hər şeyi deyə bilərlər. Lakin İranın heç vaxt İsraili xəritədən silmək kimi bir siyasəti olmayıb.”
İranlı nazir vurğulayıb ki, İran HƏMAS, Hizbullah və Husiləri “qanuni tələbləri davam etdiyi müddətdə” dəstəkləməyə davam edəcək.
“Fələstinlilər öz müqəddəratını təyin etmə haqqı uğrunda mübarizə aparırlar. İsrail isə Fələstin torpaqlarını işğal etməklə və fələstinliləri öz torpaqlarında qətlə yetirməklə mənfəət əldə edib.”
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.