BAKI, AzerVoice
Qətər, Misir və ABŞ İsrail və HƏMAS-a yaxın günlərdə Qəzza zolağındakı münaqişənin həlli ilə bağlı razılaşma imzalamaq üçün təzyiq göstərir.
AzerVoice xəbər verir ki, bu barədə "Al Arabiya" telekanalı fələstinli mənbələrə istinadən məlumat yayıb.
Mənbələrin sözlərinə görə, vasitəçilər tərəflərə yaxın günlərdə Qəzzə ilə bağlı razılaşma əldə etmək üçün təzyiq göstərirlər. Lakin onlar qeyd ediblər ki, hazırda Dohada keçirilən məsləhətləşmələrdə HƏMAS və İsrail nümayəndələri İsrail ordusunun Qəzza zolağında tutduğu mövqelərdən geri çəkilməsi məsələsində hələ razılığa gələ bilməyiblər. Eyni zamanda, mənbələrə görə, Fələstin tərəfi humanitar yardımın Qəzza zolağına yalnız BMT sisteminə daxil olan təşkilatlar vasitəsilə çatdırılmasında israr edir.
Qeyd edək ki, iyulun 6-da HƏMAS və İsrail Misir, Qətər və ABŞ-ın vasitəçiliyi ilə Dohada atəşkəsin əldə olunması və Qəzzada saxlanılan israilli girovların azad olunmasına dair danışıqları yenidən bərpa ediblər.
İyulun 15-də Qətər baş nazirinin müşaviri və Xarici İşlər Nazirliyinin rəsmi nümayəndəsi Məcid bin Məhəmməd əl-Ənsari bildirib ki, vasitəçilər tərəflərlə çərçivə razılaşmasının əldə olunması üçün işləyirlər və bu razılaşma danışıqların növbəti mərhələsinə keçidi mümkün edəcək.
Bazar ertəsi isə HƏMAS-a yaxınlığı ilə tanınan "Maan" agentliyi atəşkəs razılaşmasının bu həftə və ya gələn həftənin əvvəlində imzalana biləcəyini bildirib.
