Bakı, AzerVoice
Avropa İttifaqı (Aİ) İsrailin Qəzzada Ümumdünya Səhiyyə Təşkilatının (ÜST) binasına hücumunu pisləyib.
AzerVoice xəbər verir ki, Aİ Komissiyasının sözçüsü Anouar El Anouni İsrailin Qəzza zolağında ÜST binasına etdiyi hücumu qınayıb.
Brüsseldə keçirilən gündəlik mətbuat konfransında jurnalistlərin suallarını cavablandıran El Anouni, İsrailin Deyr əl-Bələh şəhərində yerləşən ÜST binasına hücumunun qəbuledilməz olduğunu bildirib. Onun sözlərinə görə, bu kimi hücumlar beynəlxalq hüququn pozulmasıdır və təşkilatın obyektləri mütləq şəkildə qorunmalıdır.
El Anouni eyni zamanda, İsrailin beynəlxalq jurnalistlərin Qəzzaya girişinə icazə verməməsinə də münasibət bildirib. O, informasiya əldə etmək hüququnun Aİ üçün, xüsusilə müharibə zonalarında, fundamental dəyər olduğunu vurğulayıb.
“Biz İsraili beynəlxalq jurnalistlərin Qəzzaya daxil olmasına şərait yaratmağa və onların təhlükəsizliyini təmin etməyə çağırırıq.”- deyə o qeyd edib.
Qeyd edək ki, Deyr əl-Bələh şəhərində yerləşən ÜST-nin qərargah binası və əsas anbarı İsrail ordusu tərəfindən üç dəfə hücuma məruz qalıb və bu hücumlar zamanı bir nəfər saxlanılıb.