BAKI, AzerVoice
Belçika Kralı Filipp, İsrailin Qəzza zolağına qarşı həyata keçirdiyi hücumları qınayıb.
AzerVoice xəbər verir ki, bu barədə o, Brüsseldəki sarayında çıxış edərkən danışıb.
“Günahsız insanların öldüyü Qəzzadakı ciddi humanitar pozuntuları qınayanların sırasında mən də yer alıram. Mövcud vəziyyət artıq çox uzun müddətdir davam edir” - deyə, o bildirib.
Kral həmçinin, Birləşmiş Millətlər Təşkilatının (BMT) Baş katibi Antonio Quterreşin Qəzza ilə bağlı çağırışını dəstəklədiyini qeyd edib.
“Bu vəziyyət bütün insanlıq üçün bir utanc mənbəyidir. BMT Baş katibi Antonio Quterreşin bu böhrana dərhal son qoyulmasına dair çağırışını tam şəkildə dəstəkləyirik” – deyə, o vurğulayıb.
Qeyd edək ki, bu, Kral Filippin bir münaqişə barədə ictimaiyyət qarşısında bu qədər açıq və sərt ifadələrlə çıxış etdiyi ilk haldır. Belçika konstitusiyasına əsasən, kral siyasi qərarlar verə bilməz, lakin hökumətə tövsiyə, dəstək və xəbərdarlıq edə bilər.
