BAKI, AzerVoice

25 ölkənin xarici işlər nazirləri və Avropa İttifaqının (Aİ) bərabərlik və böhranların idarə olunması üzrə komissarı Haca Lahbib İsraili Qəzza zolağında müharibəyə son qoymağa və əraziyə humanitar yardımın çatdırılmasına icazə verməyə çağırıblar.

AzerVoice xəbər verir ki, bu barədə Böyük Britaniya Xarici İşlər Nazirliyi tərəfindən yayılan birgə bəyanatda deyilir.

“Biz sadə və təxirəsalınmaz bir çağırış ətrafında birləşirik: Qəzzadakı müharibə dərhal dayandırılmalıdır. İsrail hökumətinin istifadə etdiyi humanitar yardım çatdırılma modeli təhlükəlidir, qeyri-sabitliyi dərinləşdirir və Qəzza sakinlərini insan ləyaqətindən məhrum edir. Biz İsrail hökumətini humanitar yardımın çatdırılmasına qoyduğu məhdudiyyətləri dərhal aradan qaldırmağa və BMT ilə humanitar qeyri-hökumət təşkilatlarının fəaliyyətini təhlükəsiz və effektiv şəkildə yerinə yetirməsinə təcili olaraq şərait yaratmağa çağırırıq” – deyə, bəyanatda qeyd olunub.

Sənədi Avstraliya, Avstriya, Belçika, Böyük Britaniya, Danimarka, İspaniya, İslandiya, İrlandiya, İtaliya, Kanada, Latviya, Litva, Lüksemburq, Niderland, Yeni Zelandiya, Norveç, Polşa, Portuqaliya, Sloveniya, Finlandiya, Fransa, İsveçrə, İsveç, Estoniya və Yaponiyanın xarici işlər nazirləri, həmçinin adıçəkilən Aİ komissarı imzalayıblar.

Qeyd edək ki, İsrail ordusu dünən Deyr əl-Bəlahın böyük bir hissəsi üçün köç əmrini elan etdikdən sonra minlərlə fələstinli bir gecədə bölgəni tərk etmək məcburiyyətində qalıb. Qəzzada davam edən hücumlar humanitar böhranı daha da dərinləşdirir.