BAKI, AzerVoice

İsrail ordusu bu gün Fələstinlilərə Qəzza zolağının mərkəzindən təxliyə olunmaları barədə əmr verib.

AzerVoice xəbər verir ki, bu barədə ordu sözçüsü Avixay Edri məlumat verib.

O bildirib ki, ordu Deyr əl-Balahın cənub-qərb hissəsində əməliyyatları genişləndirir. Bu əraziyə daha əvvəl heç bir hərbi müdaxilə edilməmişdi. Edri bölgədəki sakinlərə müraciət edərək, dərhal ərazini tərk etmək və cənuba, əl-Mavasiyə doğru hərəkət etmək barədə xəbərdarlıq edib.

Digər tərəfdən, Qəzza Mülki Müdafiə İdarəsinin sözçüsü Mahmud Basal bildirib ki, ötən gecə Qəzza şəhəri və cənub bölgələrinə edilən hücumlar nəticəsində 7 nəfər həlak olub.

Qeyd edək ki, Qəzza zolağında 2,4 milyon insan yaşayır və onların əksəriyyəti 2023-cü il oktyabrın 7-də başlayan müharibədən sonra azı bir dəfə köç etməyə məcbur olub. BMT-nin Humanitar Əlaqələndirmə Ofisi (OCHA) bu ilin yanvar ayında bildirmişdi ki, Qəzza ərazisinin 80 faizindən çoxu İsrail tərəfindən verilmiş təxliyə əmrləri altındadır və bu əmrlər hələ də qüvvədə qalır.