BAKI, AzerVoice
İran Silahlı Qüvvələri, İsraillə 12 gün davam edən müharibə zamanı zədələnmiş hava hücumundan müdafiə (HHM) sistemlərini qısa müddət ərzində bərpa edərək ölkənin müdafiə qabiliyyətini yenidən təmin edib.
AzerVoice xəbər verir ki, bunu ordunun komandan müavini admiral Mahmud Musəvi IRNA agentliyinə verdiyi açıqlamada deyib.
“Sionist düşmən (yəni İsrail – red.) İranın müdafiə potensialını sıradan çıxarmağa çalışdı və bu müharibə zamanı bəzi sistemlərimiz zədələndi. Lakin silahdaşlarımın səyi nəticəsində zədələnmiş sistemlər yeniləri ilə əvəz olundu və əvvəlcədən müəyyənləşdirilmiş mövqelərə yerləşdirildi” - deyə, Musəvi bildirib.
O əlavə edib ki, İsrailin ilk hücumları birbaşa olaraq HHM sistemləri və digər müdafiə obyektlərinə yönəlmişdi. "Lakin İran hərbçiləri gün ərzində fasiləsiz olaraq düşmənə qarşı durub, hava hücumundan müdafiə vasitələrinin döyüş qabiliyyətini təmin etdilər, bu da düşmənin məqsədlərinə çatmasına mane oldu" - deyə, o qeyd edib.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.
