BAKI, AzerVoice

İsrail ordusunsa, Qəzza zolağında 21 aydır davam edən hərbi əməliyyatlar fonunda, bu ilin əvvəlindən bəri 18 əsgər intihar edib.

AzerVoice xəbər verir ki, bu barədə İsrail Ordu Radiosunun ordunun statistikasına əsasən yayımladığı xəbərdə qeyd olunub.

Bu ilin ilk 6 ayında 15 əsgər öz həyatına son qoyub, yalnız iyul ayında isə üç əsgər intihar edib. Bununla da bu il intihar edən əsgərlərin sayı 18-ə çatıb. Bu göstəricinin son iki ilin eyni dövrü ilə müqayisədə ciddi artım göstərdiyi bildirilib.

İsrail mətbuatında intiharlarla bağlı yayılan xəbərlər geniş əks-səda doğurarkən, ordu rəhbərliyi artan intihar hallarına dair açıqlama verməkdən yayınıb. Orduda psixoloji problemlər yaşayan əsgərlər üçün bir dəstək proqramı başladılıb. Bu çərçivədə İsrailin “ERAN” adlı Təcili Psixoloji Yardım Xidmətindən verilən məlumata görə, təkcə iyun ayında 6 000-dən çox əsgər psixoloji dəstək üçün müraciət edib.

İsrail ordusunun sözçüsü Effi Defrin, dünən keçirilən mətbuat konfransında intihar hadisələri ilə bağlı araşdırmaların aparıldığını bildirib, lakin bu ilə dair intihar statistikalarını açıqlamaqdan imtina edib.

Qeyd edək ki, 2023-cü ilin ilk yarısında 11, 2022-ci ilin eyni dövründə isə 9 İsrail əsgəri intihar etmişdi.