BAKI, AzerVoice
İranın ali lideri Əli Xamenei bu gün (çərşənbə) bildirib ki, Tehran yeni hərbi hücuma dərhal və sərt şəkildə cavab verməyə hazırdır. Onun sözlərinə görə, İran ötən ay İsraillə 12 gün davam edən müharibədə göstərdiyindən də güclü zərbə endirmək qabiliyyətinə malikdir.
AzerVoice xəbər verir ki, o, məhkəmə hakimiyyətinin məsul şəxsləri ilə görüşdə İranın üzləşdiyi hücumlara cavabını “qəti və təsirli” adlandırıb.
O, vurğulayıb ki, İran İslam Respublikası “heç bir sahədə zəif tərəf deyil”.
Ali lider İsraili “bədxassəli xərçəng şişi” adlandıraraq, ABŞ-ı İsrailin cinayətlərində “şərik” kimi təqdim edib. Xamenei bildirib ki, Təl-Əvivin Vaşinqtonun yardımına ümid bağlaması İsrailin müdafiə imkanlarının İran qarşısında nə qədər zəif olduğunu göstərir.
Xamenei həmçinin ölkə daxilində siyasi və dini baxış fərqlərinə baxmayaraq “milli birliyin qorunmasının” vacibliyinə toxunub. O qeyd edib ki, “fikir müxtəlifliyi ölkənin və siyasi sistemin müdafiəsi kimi mühüm məsələlərdə parçalanmaya səbəb olmamalıdır”.
Onun sözlərinə görə, İsrailin başladığı müharibənin əsas məqsədi İranda hakimiyyəti devirmək olub: “Son müharibədə milli iradənin önə çıxması düşmənin planlarını pozdu”.
“Təcavüzkarların hesabı bu idi ki, İranın əsas simalarını və həssas mərkəzlərini hədəf alaraq sistemi zəiflətsinlər, sonra isə yatırılmış hüceyrələrini hərəkətə gətirib küçələrdə qarışıqlıq yaradaraq rejimi devirməyə çalışsınlar”- deyə ahıl yaşlı Xamenei bildirib.
