BAKI, AzerVoice, Səməd Əyyubov
İsrail Hərbi Hava Qüvvələrinin qırıcıları bu gün səhər saatlarında Livanın cənubunda Hizbullaha məxsus hərbi obyektlərə azı səkkiz hava zərbəsi endirib.
AzerVoice xəbər verir ki, bu barədə “Lebanon 24” xəbər portalı məlumat yayıb.
Məlumata görə, bombardman Nəbatiyyə şəhəri yaxınlığındakı Əli-Tahir rayonunda həyata keçirilib. Hücum zamanı Hizbullahın yeraltı komanda məntəqəsinin hədəfə alındığı bildirilir. Zərbələr nəticəsində Kfar-Tibnit–Xardali magistral yolunun bir hissəsində örtük ciddi zədələnib.
Qeyd edək ki, aviazərbələr barədə məlumatlar həmçinin Ərəb-əs-Salim, Arnun, Yaxmur-əş-Şkif, Xabbuş yaşayış məntəqələrindən, eləcə də Cəbel-Reyhan və İqlim-ət-Tufah dağlıq bölgəsindən daxil olub. Bu ərazilərdə Hizbullaha aid yeraltı sığınacaqlar və sursat anbarlarının yerləşdiyi qeyd olunur.
Hazırda hücumların nəticələri barədə əlavə məlumat açıqlanmayıb.
