BAKI, AzerVoice
ABŞ Prezidenti Donald Tramp İndoneziya ilə yeni ticarət razılaşmasının əldə olunduğunu elan edib.
AzerVoice xəbər verir ki, Tramp bu barədə "X" sosial şəbəkəsində yazıb.
"İndoneziya ilə az öncə hər kəs üçün əla bir razılaşma əldə olundu. Danışıqları birbaşa onların yüksək hörmətə layiq Prezidenti Prabovo Subianto ilə apardım" – deyə, ABŞ Prezidenti bildirib.
Tramp razılaşmanın detalları barədə məlumat verməsə də, yaxın zamanda əlavə açıqlama verəcəyini vəd edib.
Xatırladaq ki, daha əvvəl ABŞ Prezidenti Donald Tramp BRİKS-in “anti-amerikan siyasətini” dəstəkləyən ölkələrə qarşı əlavə 10 faiz gömrük rüsumu tətbiq edəcəyini bəyan etmişdi. Bu çərçivədə o, bir sıra ölkələrin, o cümlədən İndoneziyanın liderlərinə məktub göndərərək, avqustun 1-dən etibarən idxal tariflərinin artırılacağını bildirmişdi. İndoneziyadan gətirilən məhsullara tətbiq ediləcək tariflərin 32 faizədək qalxması planlaşdırılırdı.
İndoneziya hakimiyyəti isə cavab olaraq ABŞ-dan neft, qaz və kənd təsərrüfatı məhsullarının idxalını artırmağa hazır olduqlarını açıqlamış, bunun üçün isə ticarət rüsumlarının azaldılmasını şərt kimi irəli sürmüşdü.
