BAKI, AzerVoice
ABŞ Prezidentinin xüsusi nümayəndəsi Stiven Uitkoffun Dohada Qəzza zolağı ilə bağlı aparılan məsləhətləşmələrdə iştirakı üçün səfər tarixi hələ müəyyən edilməyib.
AzerVoice xəbər verir ki, bu barədə Qətər Baş nazirinin müşaviri və Xarici İşlər Nazirliyinin rəsmi nümayəndəsi Məcid bin Məhəmməd əl-Ənsari məlumat verib.
“Xüsusi elçi Uitkoff Dohada həmişə arzuolunan qonaqdır, lakin hazırda konkret tarix yoxdur” – deyə o, jurnalistin müvafiq sualını cavablandırıb.
Əl-Ənsari vurğulayıb ki, Qəzza zolağındakı münaqişənin həlli ilə bağlı ABŞ-la təmaslar davamlı olaraq həyata keçirilir və bu, Qətər rəsmiləri ilə ABŞ xüsusi elçisi arasında baş tutur. Onun sözlərinə görə, Uitkoff Dohada davam edən məsləhətləşmələrin gedişini gündəlik izləyir və bu məsləhətləşmələrin məqsədi çərçivə razılaşmasına nail olmaqdır. Əl-Ənsari Uitkofun ABŞ-ın Nyu-Cersi ştatında keçirilən klublararası futbol üzrə dünya çempionatının final matçında Qətər rəsmiləri ilə görüşünü isə şərh etməkdən imtina edib.
Qeyd edək ki, iyulun 7-də Ağ Evin mətbuat katibi Kerolayn Livitt bildirmişdi ki, Uitkoff yaxın günlərdə Qətərə səfər edərək Qəzza münaqişəsinin başa çatdırılması ilə bağlı danışıqlarda iştirak edəcək. Lakin iyulun 6-da “Al Arabiya” telekanalı məlumat vermişdi ki, Uitkoff hələ Dohada keçirilən məsləhətləşmələrdə iştirak etmir və yalnız danışıqlar yekun mərhələyə çatdıqda Qətərin paytaxtına gəlməyi planlaşdırır.
HƏMAS və İsrail arasında atəşkəsin əldə olunması və Qəzza zolağında saxlanılan israilli girovların azad olunması məqsədilə Misir, Qətər və ABŞ-ın vasitəçiliyi ilə aparılan danışıqlar iyulun 6-da Dohada bərpa olunub. Qətər Xarici İşlər Nazirliyinin nümayəndəsinin sözlərinə görə, məsləhətləşmələr hələ ilkin mərhələdədir və vasitəçilər HƏMAS və İsraillə ayrı-ayrılıqda işləyirlər ki, bu da dolayı danışıqlara keçidi təmin edəcək çərçivə razılaşmasının əldə olunmasına imkan yaratsın.
