BAKI,
AzerVoice
Meta ABŞ-da süni intellekt məlumat mərkəzlərinə yüz milyardlarla
dollar sərmayə qoyacaq.
AzerVoice xəbər verir ki, “Facebook”,
“Instagram” və “Threads” platformalarının sahibi olan Meta şirkəti
süni intellekt sahəsində irimiqyaslı infrastruktur layihələrinə
start verir.
Şirkətin qurucusu Mark Zukerberq ABŞ-da yerləşəcək nəhəng məlumat
mərkəzləri üçün yüz milyardlarla dollar dəyərində sərmayə
ayrıldığını açıqlayıb.
Zukerberqin sözlərinə görə, Meta-nın ilk çox-giqavatlıq süni intellekt məlumat mərkəzi olan “Prometey” 2026-cı ildə Ohayo ştatının Nyu-Albani şəhərində istifadəyə veriləcək. İkinci mərkəz — “Hyperion” isə Luiziana ştatında tikiləcək və 2030-cu ilə qədər tam fəaliyyət göstərəcək. Bu komplekslərdən biri Manhetten adasının ölçüsündə ərazini əhatə edəcək.
Meta-nın məqsədi, şirkətin ifadəsi ilə desək, “super intellekt” – yəni insan səviyyəsini aşan süni zəkanı inkişaf etdirmək üçün Titan klasterləri adlanan iri miqyaslı məlumat bazaları yaratmaqdır.
Zukerberq bildirib ki, bu məqsədlə yüz milyardlarla dollar ayrılacaq və Meta əməkdaşları “dünyanın ən güclü süni intellekt avadanlıqlarına” çıxış əldə edəcəklər. Analitiklərə görə, bu addım Meta-nın süni intellekt yarışında öndə getmək istəyi ilə bağlıdır.
Qeyd edək ki, Meta 2024-cü ildə 160 milyard dollardan çox gəlir əldə edib və bunun əsas hissəsi onlayn reklamdan gəlib. Şirkətin səhmləri Zukerberqin açıqlamasından sonra 1 faiz artıb, il ərzində ümumi artım isə 20 faizi keçib.
Ətraf mühitlə bağlı narahatlıqlar da gündəmdədir. Araşdırmalara görə, süni intellektlə işləyən məlumat mərkəzləri böyük miqdarda enerji və su sərf edir. Tək bir AI sorğusu kiçik bir su şüşəsi qədər istehlaka səbəb ola bilər. 2027-ci ilə qədər bu sistemlərin 1,7 trilyon qallon su istifadə edə biləcəyi proqnozlaşdırılır.
