BAKI, AzerVoice
İsraillə 12 günlük müharibə zamanı İraınn varlığı və ərazi bütövlüyü görünməmiş bir təhdidə məruz qalıb.
AzerVoice xəbər verir ki, bunu İran Silahlı Qüvvələrinin Baş Qərargah rəisi Əbdürrəhim Musəvi deyib.
O qeyd edib ki, İran İslam İnqilabı Keşikçiləri Korpusunun (SEPAH) raket bölməsinin göstərdiyi performans, İran-İraq müharibəsi də daxil olmaqla, ölkənin hərbi tarixindəki bütün uğurları geridə qoyub. Onun sözlərinə görə, bu, ölkənin mövcudluğuna və ərazi bütövlüyünə qarşı görünməmiş bir təhlükə idi.
“Silahlı qüvvələr düşmənin hər hansı təxribatı qarşısında güclü və qətiyyətli cavab verməyə tam hazırdır”, - Baş Qərargah rəisi əlavə edib.
Digər tərəfdən, bölmənin yeni komandiri general Məcidd Musəvi bildirib ki, raket qüvvələri “barmaq tətikdə olmaqla” tam döyüş hazırlığı vəziyyətindədir. O, Baş Qərargah və Mərkəzi Əməliyyatlar Qərargahı ilə daimi koordinasiyanın aparıldığını vurğulayıb.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.