BAKI, AzerVoice
ABŞ Prezidenti Donald Tramp ona qarşı təşkil edilmiş sui-qəsdlə bağlı FBI, Gizli Xidmət və Ədliyyə Nazirliyindən aldığı hesabatlardan məmnun olduğunu, lakin həmin gün hüquq-mühafizə orqanlarının bəzi səhvlərə yol verdiyini bildirib.
AzerVoice xəbər verir ki bu haqqda o, Fox News telekanalına verdiyi müsahibədə deyib.
“FBI, Gizli Xidmət və Ədliyyə Nazirliyindən mənə bir neçə dəfə məlumat verdilər. Mən ümumilikdə razı qaldım. Amma binanın içində mütləq kimsə olmalı idi – bu, böyük bir səhv idi. Onlar yerli polisə də məlumat verməli idilər. Elə səhvlər buraxılıb ki, bunlar baş verməməli idi” - deyə, Tramp vurğulayıb.
Bununla belə Tramp əlavə edib ki, bu insanlara güvənir, onları istedadlı adlandırıb və bildirib ki, onlar sadəcə pis bir gün keçiriblər. “Amma mən böyük mənzərə baxımından razı qaldım” – deyə, o vurğulayıb.
Qeyd edək ki, Trampa qarşı sui-qəsd iyulun 13-də, onun Pensilvaniyada keçirilən seçki kampaniyası mitingi zamanı baş verib. 20 yaşlı Tomas Metyu Kruks adlı şəxs Trampı güllələməyə cəhd edib. Hücum edən şəxs hadisə yerində zərərsizləşdirilib, üzərindən "AR-15" tipli yarıavtomatik tüfəng tapılıb.
Tramp həmin anda yalnız yüngül xəsarət alıb. Hadisə nəticəsində bir tamaşaçı həlak olub, daha iki nəfər isə yaralanıb.
