BAKI, AzerVoice

Qətər və Misir İsrailin Qəzza zolağından qoşunların çıxarılması ilə bağlı Dohada keçirilən məsləhətləşmələr zamanı təqdim etdiyi plana dəyişiklik etməsini gözləyir.

AzerVoice xəbər verir ki, bu barədə “Al Arabiya” telekanalı mənbəyə istinadla məlumat yayıb.

“Vasitəçilər İsraildən Qəzzadan qoşunların çıxarılmasını əks etdirən xəritələrdə düzəlişlər gözləyir” - deyə, mənbə bildirib. Onun sözlərinə görə, İsrail bu yenilənmiş planı şənbə və ya bazar günü təqdim edə bilər.

Bundan əvvəl “Agence France-Presse” (AFP) agentliyi fələstinli mənbələrə istinadla məlumat vermişdi ki, İsrailin Qəzzada hərbi mövcudluğu saxlamaq istəyi Dohada tərəflərlə aparılan vasitəçilik məsləhətləşmələrini çətinləşdirir. Agentliyin məlumatına əsasən, cümə günü İsrail nümayəndə heyəti Qəzzadan qoşunların çıxarılması ilə bağlı xəritə təqdim edib, lakin Fələstin tərəfi bu sənədin yalnız İsrail ordusunun yenidən yerləşdirilməsi və qruplaşması planı olduğunu bildirib. Mənbənin sözlərinə görə, sənəd İsrail qoşunlarının Qəzza zolağının 40 faizindən çox hissəsində qalmasını nəzərdə tutur.

6 iyul tarixində HƏMAS və İsrail Misir, Qətər və ABŞ-ın vasitəçiliyi ilə Dohada atəşkəsin əldə olunması və Qəzzada saxlanılan israilli girovların azad edilməsi istiqamətində danışıqlara yenidən başlamışdılar. İyulun 8-də Qətər Baş nazirinin müşaviri və Xarici İşlər Nazirliyinin rəsmi nümayəndəsi Məcid bin Məhəmməd əl-Ənsari bildirmişdi ki, hələlik danışıqlara başlanmayıb və vasitəçilər HƏMAS və İsrail nümayəndələri ilə fikir ayrılıqlarını aradan qaldırmaq və gələcək danışıqların çərçivəsini müəyyənləşdirmək üçün ilkin məsləhətləşmələr aparırlar. O əlavə etmişdi ki, Qəzzada atəşkəslə bağlı razılaşmanın əldə olunması üçün zaman tələb olunur.