BAKI,
AzerVoice
İsraildə ifrat sağçı nazir Qəzzanın tam işğalına və fələstinlilərin
köçürülməsinə çağırış edib.
AzerVoice xəbər verir ki, İsrailin milli təhlükəsizlik naziri, ifrat sağçı İtamar Ben-Qvir atəşkəs təşəbbüslərinin gündəmdə olduğu bir vaxtda radikal mövqe sərgiləyərək “bütün Qəzzanın işğalı, humanitar yardımın dayandırılması və fələstinlilərin məcburi köçürülməsi” çağırışı ilə çıxış edib.
İsrail Ordusu Radiosuna danışan Ben-Qvir, HƏMAS-la atəşkəs və əsir mübadiləsi ilə bağlı razılaşmaları “dəhşətli səhv” adlandıraraq, “Bir an belə dayanmaq olmaz. Mütləq qələbə qazanmalı, bütün Qəzzanı işğal etməli və yardım axınını dayandırmalıyıq.” - deyə bildirib.
Ben-Qvir dövlət televiziyası KAN-a verdiyi açıqlamada da eyni mövqeni təkrar edib və bu cür razılaşmaları dəstəkləməyəcəyini vurğulayıb. İsrail mediasına görə, o, atəşkəsin qarşısını almaq üçün planlar hazırlayır və maliyyə naziri Bezalel Smotriçə də bu istiqamətdə mesajlar göndərib.
Bu arada, HƏMAS və İsrail arasında atəşkəs müzakirələri davam etsə də, İsrail ordusunun Qəzzaya intensiv hücumları dayanmır. Fələstin Səhiyyə Nazirliyi son 24 saatda 118 nəfərin, o cümlədən qadın və uşaqların həlak olduğunu, 500-dən çox insanın yaralandığını bildirib. 7 oktyabr 2023-cü ildən bəri ölən fələstinlilərin sayı 57 min 130 nəfəri ötüb.
İfrat sağçı nazir Ben-Qvir və maliyyə naziri Smotriç daha əvvəl də atəşkəsə qarşı çıxış etmişdilər. Ben-Qvir bu ilin əvvəlində razılaşma qüvvəyə mindikdən sonra partiyasının hökumətdən istefa verdiyini açıqlamışdı. Smotriç isə müqaviləyə qarşı olduğunu bildirsə də, hökumətdə qalmağa davam edir.
Qeyd edək ki, ABŞ prezidenti Donald Tramp İsrailin 60 günlük atəşkəs üçün zəruri şərtləri qəbul etdiyini bəyan edib. O, bu müddətdə müharibəni sona çatdırmaq üçün tərəflərlə işləyəcəklərini vurğulayıb. Netanyahu ilə Trampın iyulun 7-də Vaşinqtonda görüşü planlaşdırılıb və bu görüşdə Qəzza və İranla bağlı məsələlər müzakirə olunacaq.
