BAKI, AzerVoice

Hazırda ABŞ ilə İran arasında növbəti danışıqların keçirilməsi üçün hər hansı konkret tarix müəyyən edilməyib.

AzerVoice xəbər verir ki, bu barədə Ağ Evin mətbuat katibi Kerolayn Livitt jurnalistlər üçün keçirilən brifinqdə məlumat verib.

Jurnalistlər ABŞ Prezidenti Donald Trampın gələn həftə ABŞ və İran nümayəndə heyətlərinin görüşəcəyi barədə bəyanatına dair təfərrüatları soruşublar. Livitt cavabında bildirib: “Hazırda planlaşdırılmış heç bir görüş yoxdur, lakin bu səhər Prezidentin xüsusi nümayəndəsi Stiven Uitkoffla geniş müzakirə apardım və sizi əmin edə bilərəm ki, iranlılarla əlaqə saxlamağa davam edirik. Bu prosesdə əsas vasitəçilərimiz olan qətərlilər bizə böyük dəstək göstərirlər.”

Onun sözlərinə görə, Uitkoff İranın nüvə proqramı ilə bağlı razılaşmaya nail olmaq üçün işlərini davam etdirir.

“Prezident [Donald Tramp] şənbə axşamı güc tətbiq etdi. Bütün dünya ABŞ-ın dəqiq zərbələri ilə dünyanın ən güclü döyüş qüvvəsi olduğunu gördü. Amma prezident sülh istəyir, o, həmişə bunu istəyib. Hazırda biz İranla münasibətlərdə diplomatik yoldayıq. Prezident və komandası, xüsusilə də Uitkoff, İranla və regiondakı körfəz ölkələri və ərəb tərəfdaşlarımızla danışıqları davam etdirirlər ki, İranla razılaşmaya gəlinə bilsin” - deyə, Livitt əlavə edib.

Livittin sözlərinə görə, bu danışıqların əsas məqsədi davamlı sülhə nail olmaqdır.

Qeyd edək ki, çərşənbə günü Haaqada keçirilən NATO sammitindən sonra keçirdiyi mətbuat konfransında ABŞ Prezidenti Donald Tramp administrasiyanın gələn həftə İranla onun nüvə proqramı ilə bağlı danışıqlar aparmağı və razılıq əldə etməyi planlaşdırdığını açıqlamışdı.