BAKI, AzerVoice

Öldüyü iddia edilən iranlı general Qaani Tehranda görünüb.

AzerVoice xəbər verir ki, İsrailin iyunun 13-də İrana endirdiyi hava zərbələri zamanı öldürüldüyü bildirilən İran İnqilabı Keşikçiləri Korpusunun Qüds Qüvvələrinin komandanı general-mayor İsmayıl Qaani Tehranda keçirilən nümayişlərdə iştirak edib.

İranın rəsmi xəbər agentliyi İRNA Qaaninin İsraillə atəşkəsdən sonra paytaxt Tehrandakı İnqilab meydanında təşkil olunan "qələbə şənlikləri"nə qatıldığını əks etdirən görüntüləri yayımlayıb. Kadrlarda onun mühafizəçiləri ilə birlikdə meydanda vətəndaşlarla görüşdüyü əks olunub.

Xatırladaq ki, ABŞ mətbuatında, o cümlədən "The New York Times" nəşrində İsrailin hava hücumları nəticəsində general Qaaninin həlak olduğu iddia edilmişdi. Nəşr bu informasiyanı "adı açıqlanmayan İran mənbələrinə" istinadən yaymışdı.

Qeyd edək ki, təxminən iki həftə davam edən qarşılıqlı hücumlardan sonra İran və İsrail arasında atəşkəs elan olunub. Ardınca isə Tehranda minlərlə insan qələbəni qeyd etmək üçün İnqilab meydanına toplaşıb.