BAKI, AzerVoice
ABŞ-ın bunker deşici MOP bombaları ilə İranın Fordo nüvə
obyektinə endirdiyi hücumdan sonra obyektin tam məhv
edilib-edilmədiyi müzakirələrə səbəb olub.
AzerVoice xəbər verir ki, ABŞ
prezidenti Donald Tramp hücumun Fordonu tamamilə məhv etdiyini
iddia etsə də, Pentaqonun sızan kəşfiyyat hesabatı bunun əksini
göstərir.
Bazar günü səhər B-2 bombardmançı təyyarələri ilə həyata keçirilən əməliyyatda 13,6 tonluq GBU-57 tipli MOP bombaları istifadə edilib. Hücumun əsas hədəfi yerin 90 metr dərinliyində yerləşən Fordo nüvə zənginləşdirmə mərkəzi olub. Tramp “obyektin tamamilə sıradan çıxarıldığını” bəyan etsə də, Müdafiə Kəşfiyyat Agentliyinin (DİA) CNN-ə sızan hesabatında obyektin “əsas komponentlərinin salamat qaldığı”, hücumun isə İranın nüvə proqramını yalnız bir neçə ay geriyə atdığı vurğulanıb.
Trampın müavini, senator JD Vance də Fox News-a açıqlamasında hücumun “sarsıdıcı ziyan” verdiyini iddia etsə də, İran Atom Enerjisi Təşkilatı hücumların nüvə işlərinə təsir etmədiyini, istehsal və xidmət prosesinin fasiləsiz davam etdiyini bildirib.
Mütəxəssislər peyk görüntülərinə əsaslanaraq bildiriblər ki, Fordo kimi dağ içində yerləşən və qranit-bazalt struktura sahib obyektin tamamilə sıradan çıxarılması üçün bir nöqtəyə eyni anda ən azı iki və ya üç bunker-deşici bombanın düşməsi lazım idi. Bununla belə, hücumun bu şərtləri tam yerinə yetirib-yetirmədiyinə dair dəqiq sübutlar yoxdur.
Ən çox mübahisə doğuran məqam isə hücumdan əvvəl İran tərəfindən
Fordodan çıxarıldığı iddia edilən 400 kq zənginləşdirilmiş uranın
aqibətidir. Hazırda bu uranın harada saxlandığı, başqa obyektə
köçürülüb-köçürülmədiyi və ya təhlükəsizliyinin təmin
olunub-olunmadığı ilə bağlı rəsmi və ya beynəlxalq təsdiq
yoxdur.
Qeyd edək ki, ABŞ Hərbi Hava Qüvvələri iyunun 22-ə keçən gecə İran
ərazisində yerləşən Fordo, Nətənz və İsfahan nüvə obyektlərinə hava
zərbələri endirib. Hücum nəticəsində hər üç nüvə obyektinin məhv
edildiyi qeyd olunub.
