BAKI, AzerVoice
Heç kimə hücum etməmişik, bizə edilən hücumu da qəbul etmərik.
AzerVoice xəbər verir ki, İranın ali
dini lideri Əli Xamenei ölkəsinin heç bir tərəfə hücum etmədiyini
və hər hansı xarici hücumu qəbul etməyəcəyini bəyan edib.
O, “X” sosial platformasında fars dilində paylaşımında “Biz heç
kimin təqibinə boyun əyməyəcəyik. Bu, İran millətidir!” - deyə
bildirib.
Bəyanat, İsrail və İran arasında qarşıdurmanın 12-ci gününə qədəm qoyduğu bir vaxtda səsləndirilib. Tehran ABŞ-ı nüvə obyektlərinə ediləcək mümkün hücumların “ağır nəticələri” barədə xəbərdar edib.
Bununla yanaşı, İran İnqilab Keşikçiləri Korpusu (SEPAH) Qətərdə yerləşən Əl-Udeyd Hərbi Hava Bazasını “dağıdıcı və güclü” raketlərlə vurduğunu açıqlayıb. Qətər isə hücuma cavab vermək hüququnu özündə saxladığını bildirib.
ABŞ prezidenti Donald Tramp isə sosial media platforması “Truth Social”da yayımladığı paylaşımda İranda rejim dəyişikliyinə eyham vurub. O, seçki kampaniyası şüarını “Amerikanı yenidən möhtəşəm et!” formasında təqdim edərək iranlıları “İranı yenidən möhtəşəm etməyə!” çağırıb.
Digər tərəfdən, İranın xarici işlər naziri Abbas Arakçi İstanbulda verdiyi açıqlamada, “İrandan diplomatiyaya qayıtmasını istəməyin mənasız olduğunu” deyib. O bildirib ki, “İndi diplomatiya zamanı deyil.”
Eyni zamanda, İsrail ordusu İranın qərbində yerləşən 6 hərbi hava bazasını bombaladığını, bu hücumlarda 16 döyüş təyyarəsi və helikopterin məhv edildiyini açıqlayıb. İsrailin müdafiə naziri Yisrael Katz isə Tehrana qarşı “görünməmiş” hücumların həyata keçirildiyini bildirib.
